aaj ikaTTha kar ke ishq ke maron ko

aaj ikaTThā kar ke 'ishq ke māroñ ko

gher liyā hai ham ne duniyā-dāroñ ko

saath ke saare qaidī aisā kahte the

ham ne bhī ghar maan liyā dīvāroñ ko

achchhe ho kar lauT ga.e sab ghar lekin

maut kā chehra yaad rahā bīmāroñ ko

dhaar ko parkhā zang ke dhabbe saaf kiye

phir baiThak meñ Taañg diyā talvāroñ ko

jaao apne hisse ke tum ‘aish karo

'ishq meñ ham bhī bhuul ga.e the yāroñ ko

mere 'alāva kaun jagāne aatā hai

pichhle pahar ke so.e hue bāzāroñ ko

sub.h kā matlab sub.h kā pahlā cigarette thā

vo bhī ab lā-hāsil hai bīmāroñ ko

aaj ikaTTha kar ke 'ishq ke maron ko

gher liya hai hum ne duniya-daron ko

sath ke sare qaidi aisa kahte the

hum ne bhi ghar man liya diwaron ko

achchhe ho kar lauT gae sab ghar lekin

maut ka chehra yaad raha bimaron ko

dhaar ko parkha zang ke dhabbe saf kiye

phir baiThak mein Tang diya talwaron ko

jao apne hisse ke tum ‘aish karo

'ishq mein hum bhi bhul gae the yaron ko

mere 'alawa kaun jagane aata hai

pichhle pahar ke soe hue bazaron ko

subh ka matlab subh ka pahla cigarette tha

wo bhi ab la-hasil hai bimaron ko