aankh se aansu to dil se Dar uTha kar le gaya

aañkh se aañsū to dil se Dar uThā kar le gayā

ek manzar saare pas-manzar uThā kar le gayā

kis ne pahchānā yahāñ in kor-bīnoñ meñ mujhe

kaun merā lāsha-e-be-sar uThā kar le gayā

mil gayā mujh meñ jise jo chāhiye thā aur phir

koī hiire aur koī patthar uThā kar le gayā

merī āñkheñ shahr ke kūza-garoñ meñ baT ga.iiñ

merā siina ek āhan-gar uThā kar le gayā

jis se ik patthar na uTh paatā thā ab vo nā-tavāñ

uñgliyoñ par 'ishq kā ḳhaibar uThā kar le gayā

saare manzar saath us ke 'umr bhar chalte rahe

apne kāñdhoñ par vo apnā ghar uThā kar le gayā

aankh se aansu to dil se Dar uTha kar le gaya

ek manzar sare pas-manzar uTha kar le gaya

kis ne pahchana yahan in kor-binon mein mujhe

kaun mera lasha-e-be-sar uTha kar le gaya

mil gaya mujh mein jise jo chahiye tha aur phir

koi hire aur koi patthar uTha kar le gaya

meri aankhen shahr ke kuza-garon mein baT gain

mera sina ek aahan-gar uTha kar le gaya

jis se ek patthar na uTh pata tha ab wo na-tawan

ungliyon par 'ishq ka KHaibar uTha kar le gaya

sare manzar sath us ke 'umr bhar chalte rahe

apne kandhon par wo apna ghar uTha kar le gaya