yaad tum aae to phir ban gain baadal aankhen

yaad tum aa.e to phir ban ga.iiñ bādal āñkheñ

dil ke vīrāne ko karne lagīñ jal-thal āñkheñ

merī āñkhoñ kā koī abr se rishta hai zarūr

TuuT ke barsī ghaTā jab huiiñ bojhal āñkheñ

ḳhvāb ko ḳhvāb samajhtī hī nahīñ jaane kyuuñ

DhūñDhtī rahtī haiñ ik shaḳhs ko pāgal āñkheñ

kaisā rishta hai ta.alluq hai ye kaisā āḳhir

choT to dil pe lagī ho ga.iiñ ghāyal āñkheñ

shoḳhiyāñ sharm-o-hayā nuur ke saa.e jheleñ

umr meñ pahle-pahal dekheñ mukammal āñkheñ

jis tarah koī ġhazal likkhī ho matle.a ke baġhair

yuuñ nazar aatī haiñ akasr binā kājal āñkheñ

ai 'shakīl' un se kaho pyaar se vo duur raheñ

dard kā bojh na sah pā.eñgī chanchal āñkheñ

yaad tum aae to phir ban gain baadal aankhen

dil ke virane ko karne lagin jal-thal aankhen

meri aankhon ka koi abr se rishta hai zarur

TuT ke barsi ghaTa jab huin bojhal aankhen

KHwab ko KHwab samajhti hi nahin jaane kyun

DhunDhti rahti hain ek shaKHs ko pagal aankhen

kaisa rishta hai talluq hai ye kaisa aaKHir

choT to dil pe lagi ho gain ghayal aankhen

shoKHiyan sharm-o-haya nur ke sae jhelen

umr mein pahle-pahal dekhen mukammal aankhen

jis tarah koi ghazal likkhi ho matlea ke baghair

yun nazar aati hain akasr bina kajal aankhen

ai 'shakil' un se kaho pyar se wo dur rahen

dard ka bojh na sah paengi chanchal aankhen