آپ ہی آسان ہو جائے گی ہر مشکل ابھی

آپ ہی آسان ہو جائے گی ہر مشکل ابھی

ہو تو لے تیرا کہے جانے کے قابل دل ابھی

کوشش اندازۂ ذلت ہے لا حاصل ابھی

دیکھیے کیا کیا نہ دکھلائے یہ شوق دل ابھی

جزر و مد میں یوں کہاں بیڑا لگا دے ناخدا

ہو تو لے گھٹ بڑھ کے قائم اک جگہ ساحل ابھی

حشر تک ٹھنڈا نہ ہوگا جوش خون بے گناہ

کروٹیں لے گا ہزاروں آپ کا بسمل ابھی

ہے سخی کا در تو کیا عجلت ہے اے شوق سوال

دینے والے کی نظر تو دیکھ لے سائل ابھی

ہر قدم پر تھام کر بازو یہی کہتا ہے شوق

اٹھ تھکے ماندے مسافر آتی ہے منزل ابھی

آڑ لی جس کی وہی دیوار سر پر آ گئی

جس جگہ ڈوبی ہے کشتی تھا یہی ساحل ابھی

رات گزری شمع پگھلی خاک پروانے ہوئے

ہم یہی سوچا کیے جم لے ذرا محفل ابھی

سعی ہے بے کار آؤ بیٹھ کر روئیں ارمؔ

پائے شل اٹھتے نہیں اور دور ہے منزل ابھی