اب کوئی چیز باعث راحت نہیں مجھے

اب کوئی چیز باعث راحت نہیں مجھے

یوں زندگی سے کوئی عداوت نہیں مجھے

رہتا ہوں اجنبی سا گل و گلستاں میں میں

رنگ و بہار سے کوئی رغبت نہیں مجھے

گرتی ہو جس پہ برق تڑپ کر نہ ہم نشیں

اس آشیاں سے کوئی بھی نسبت نہیں مجھے

رہ رہ کے یاد آتی ہیں تیری نوازشیں

اے چشم ناز تجھ سے شکایت نہیں مجھے

لیتا ہوں چھپ کے نام ترا حسرتوں سے میں

پھر سے مچل نہ جائیں یہ حسرت نہیں مجھے

عادت سی ہو گئی ہے تڑپنے کی اے نشاؔ

کوئی بھی حادثہ ہو قیامت نہیں مجھے