اب سمجھا ہے اب جانا ہے

اب سمجھا ہے اب جانا ہے

بیگانہ پھر بیگانہ ہے

یہ مجبوری پر مجبوری

خاموشی بھی افسانہ ہے

یہ پھولوں کی رت یہ آنسو

فطرت ہی کچھ غم کھانا ہے

کتنی ہی آسیں ٹوٹی ہیں

اتنا ہی اب تک جانا ہے

تسکین دل کہئے جس کو

افسانہ ہی افسانہ ہے

تیرے کارن تیرے باعث

تیرے غم کو غم جانا ہے

ان کا افسانہ ہے میں ہوں

میں ہوں ان کا افسانہ ہے

کیسی صبحیں کیسی شامیں

رونا ہے یا رلوانا ہے

دنیا ہنسنے والی دنیا

رونے والا دیوانہ ہے