ابھی جی بھر کے پی لو پھر نہ یہ موسم بدل جائے

ابھی جی بھر کے پی لو پھر نہ یہ موسم بدل جائے

نہ جانے یہ پری پھر کون سے شیشے میں ڈھل جائے

بہت سمجھا بجھا کر راہ پر لائے ہیں اس دل کو

کہیں ظالم نہ پھر کوئی نرالی چال چل جائے

دعاؤں سے ملے بھی کچھ تو شاید موت ملتی ہے

یہ وہ جادو نہیں جو زندگی کے سر پہ چل جائے

جنوں لے کر چلا ہے مجھ کو پھر کوئے حریفاں میں

جو باقی رہ گیا ہے اب وہ کانٹا بھی نکل جائے

وہ رسماً ہی سہی لیکن خبر لیتے رہو اس کی

دل آخر دل ہے کیا جانے کہاں جا کر بہل جائے