اے جنوں اتنا تو کر وقت عطا کم از کم

اے جنوں اتنا تو کر وقت عطا کم از کم

کر سکوں تجھ میں اضافے کی دعا کم از کم

اپنے رہنے کے لیے کچھ تو جگہ کر مجھ میں

گر ہٹانی نہیں دنیا تو گھٹا کم از کم

کوئی الزام تو ثابت نہیں کر پایا تو

کیا سزا سوچ کے رکھی تھی بتا کم از کم

غم گساری کے فرائض تو سمجھ لے پہلے

تیرے چہرے پے خوشی ہے وہ چھپا کم از کم

تیری تصویر بنانے میں مدد کر اس کی

اس مصور کے لیے رنگ بنا کم از کم

میں اگر کھیل ہوں تو کھیلنے کی کوشش کر

میں تماشہ ہوں تو پھر دیکھنے آ کم از کم

تیرا جانا ہو اگر یاد کے میخانے میں

تو مرے نام کا اک جام اٹھا کم از کم

جانے کب سے ہے تو مہمان مری آنکھوں کا

تیری آنکھوں کو میرے خواب دکھا کم از کم

تجھ کو لڑنا ترے دشمن نے سکھایا تھا نواؔ

اس کی تربت پہ کچھ آنسو تو بہا کم از کم