apni aankhen tere chehre pe laga kar dekhun

apnī āñkheñ tire chehre pe lagā kar dekhūñ

aur phir apnā bikhartā huā manzar dekhūñ

niiñd aa.e to koī gosha-e-tanhā.ī bahut

paañv phailāne kī hasrat ho to chādar dekhūñ

kitnī rāteñ isī ḳhvāhish meñ bitā.īñ maiñ ne

chāñd nikle to zarā ghar se nikal kar dekhūñ

pesh jab kar hī chukā harf-e-aqīdat us ko

kyoñ na us haath pe īmān bhī lā kar dekhūñ

'aks shāyad hai salāmat pas-e-ā.īna-e-jāñ

apnī jānib ka.ī baḌhte hue lashkar dekhūñ

kaun is tishnagī-e-rūh-o-badan ko samjhe

biich sahrā meñ khaḌe ho ke samundar dekhūñ

mausam-e-sang-zanī kī hai ḳhabar garm 'jamāl'

dast-o-bāzū kabhī dekhūñ to kabhī sar dekhūñ

apni aankhen tere chehre pe laga kar dekhun

aur phir apna bikharta hua manzar dekhun

nind aae to koi gosha-e-tanhai bahut

panw phailane ki hasrat ho to chadar dekhun

kitni raaten isi KHwahish mein bitain main ne

chand nikle to zara ghar se nikal kar dekhun

pesh jab kar hi chuka harf-e-aqidat us ko

kyon na us hath pe iman bhi la kar dekhun

'aks shayad hai salamat pas-e-aina-e-jaan

apni jaanib kai baDhte hue lashkar dekhun

kaun is tishnagi-e-ruh-o-badan ko samjhe

bich sahra mein khaDe ho ke samundar dekhun

mausam-e-sang-zani ki hai KHabar garm 'jamal'

dast-o-bazu kabhi dekhun to kabhi sar dekhun