auron ka tha bayan to mauj sada rahe

auroñ kā thā bayān to mauj sadā rahe

ḳhud umr bhar asīr-e-lab-e-mudda.ā rahe

misl-e-habāb bahr-e-ġham-e-hādsāt meñ

ham zer-e-bār-e-minnat-e-āb-o-havā rahe

ham us se apnī baat kā māñgeñ agar javāb

lahroñ kā pech-o-ḳham vo khaḌā dekhtā rahe

aayā to apnī aañkh bhī apnī na ban sakī

ham sochte the us se kabhī sāmnā rahe

gulshan meñ the to raunaq-e-rañg-e-chaman bane

jañgal meñ ham amānat-e-bād-e-sabā rahe

surḳhī bane to ḳhūn-e-shahīdāñ kā rañg the

raushan hue to mash.al-e-rāh-e-baqā rahe

'amjad' dar-e-nigār pe dastak hī dījiye

is be-karāñ sukūt meñ kuchh ġhalġhala rahe

auron ka tha bayan to mauj sada rahe

KHud umr bhar asir-e-lab-e-muddaa rahe

misl-e-habab bahr-e-gham-e-hadsat mein

hum zer-e-bar-e-minnat-e-ab-o-hawa rahe

hum us se apni baat ka mangen agar jawab

lahron ka pech-o-KHam wo khaDa dekhta rahe

aaya to apni aankh bhi apni na ban saki

hum sochte the us se kabhi samna rahe

gulshan mein the to raunaq-e-rang-e-chaman bane

jangal mein hum amanat-e-baad-e-saba rahe

surKHi bane to KHun-e-shahidan ka rang the

raushan hue to mashal-e-rah-e-baqa rahe

'amjad' dar-e-nigar pe dastak hi dijiye

is be-karan sukut mein kuchh ghalghala rahe