ba-harf-e-surat inkar toD di maine

ba-harf-e-sūrat inkār toḌ dī maiñ ne

diloñ ke biich kī dīvār toḌ dī maiñ ne

vo be-ḳhudī meñ tirā naam lab pe aa hī gayā

lo ye qasam bhī mire yaar toḌ dī maiñ ne

tire ġhubār-e-kaf-e-pā kī kaj-kulāhī meñ

ġhurūr-o-naḳhvat-e-dastār toḌ dī maiñ ne

is ājizī se kiyā us ne mere sar kā savāl

ḳhud apne haath se talvār toḌ dī maiñ ne

kuchh is tarah se baḌhī lazzat-e-ḳhalish dil kī

jigar meñ dard kī sūfār toḌ dī maiñ ne

sadā-e-nāla-e-be-iḳhtiyār se apne

tire sukūt kī raftār toḌ dī maiñ ne

mire jasārat-e-tarz-e-suḳhan kī daad to de

rivāyat-e-lab-o-ruḳhsār toḌ dī maiñ ne

ba-harf-e-surat inkar toD di main ne

dilon ke bich ki diwar toD di main ne

wo be-KHudi mein tera nam lab pe aa hi gaya

lo ye qasam bhi mere yar toD di main ne

tere ghubar-e-kaf-e-pa ki kaj-kulahi mein

ghurur-o-naKHwat-e-dastar toD di main ne

is aajizi se kiya us ne mere sar ka sawal

KHud apne hath se talwar toD di main ne

kuchh is tarah se baDhi lazzat-e-KHalish dil ki

jigar mein dard ki sufar toD di main ne

sada-e-nala-e-be-iKHtiyar se apne

tere sukut ki raftar toD di main ne

mere jasarat-e-tarz-e-suKHan ki dad to de

riwayat-e-lab-o-ruKHsar toD di main ne