بات پھر نکلی نئی اک بات سے

بات پھر نکلی نئی اک بات سے

لفظ آگے بڑھ گئے اوقات سے

میں ہوں صدیوں کا اندھیرا میری جان

آپ تو جاگے ہوئے ہیں رات سے

پانیوں نے پانیوں سے جنگ کی

آج پھر آنکھیں لڑیں برسات سے

تم دھرے بیٹھے رہو ہاتھوں پہ ہاتھ

درد بھی اب جا رہا ہے ہاتھ سے

عالم بالا میں کیسی شاعری

داد لیں کیا حور سے جنات سے

تم برستے بھی نہیں ہو کھل کے اب

اور کیا مانگا کریں برسات سے

آیا سجدے میں یہ بیہودہ خیال

اتنی امید اک خدا کی ذات سے