bhari hui hai dil-e-zar mein hawa-e-qafas

bharī huī hai dil-e-zār meñ havā-e-qafas

chaman meñ jī na lagegā kahīñ sivā.e qafas

tire asīr-e-sitam haiñ ye mubtalā-e-qafas

kabhī na dekheñ sū-e-āshiyāñ sivā.e qafas

gayā na ḳhaar asīrī kā dil se tā-dam-e-marg

hazār phūloñ ke sayyād ne banā.e qafas

asiir ho ke chhuTe fikr-e-āb-o-dāna se

ziyāda kyuuñ na gulistāñ se ham ko bhaa.e qafas

na pūchh shauq-e-amīrī hai kis qadar sayyād

vo andalīb huuñ duuñ naqd-e-jāñ bahā-e-qafas

maiñ huuñ vo bulbul-e-mahv-e-asīrī-e-bedād

rahegī ruuh bhī ba.ad-e-fanā fidā-e-qafas

na bhūlte the kisī tarah āshiyāñ kī yaad

bahut dinoñ meñ huā huuñ maiñ āshnā-e-qafas

sitam bhī lutf se sayyād kā nahīñ ḳhālī

ki band kartā hai phūloñ se raḳhna-hā-e-qafas

'qalaq' na shaad hue kuchh bhī ham rihā ho kar

chaman meñ yaad bahut aa.e āshnā-e-qafas

bhari hui hai dil-e-zar mein hawa-e-qafas

chaman mein ji na lagega kahin siwae qafas

tere asir-e-sitam hain ye mubtala-e-qafas

kabhi na dekhen su-e-ashiyan siwae qafas

gaya na KHar asiri ka dil se ta-dam-e-marg

hazar phulon ke sayyaad ne banae qafas

asir ho ke chhuTe fikr-e-ab-o-dana se

ziyaada kyun na gulistan se hum ko bhae qafas

na puchh shauq-e-amiri hai kis qadar sayyaad

wo andalib hun dun naqd-e-jaan baha-e-qafas

main hun wo bulbul-e-mahw-e-asiri-e-bedad

rahegi ruh bhi baad-e-fana fida-e-qafas

na bhulte the kisi tarah aashiyan ki yaad

bahut dinon mein hua hun main aashna-e-qafas

sitam bhi lutf se sayyaad ka nahin KHali

ki band karta hai phulon se raKHna-ha-e-qafas

'qalaq' na shad hue kuchh bhi hum riha ho kar

chaman mein yaad bahut aae aashna-e-qafas