chhuT ke ye qaid-e-makan se la-makan tak jaegi

chhuT ke ye qaid-e-makāñ se lā-makāñ tak jā.egī

bahr-e-dil kī mauj bahr-e-be-karāñ tak jā.egī

ik zarā mahmez kar phir dekh is ke bāl-o-par

fikr kī parvāz bām-e-āsmāñ tak jā.egī

chupke chupke hī bhaḌak uTheñge jab andoh-e-ġham

chupke chupke aañch bhī qalb-e-tapāñ tak jā.egī

tum jalāo to sahī rāsiḳh yaqīñ kī mish.aleñ

jur.at-e-dil vādī-e-azm-e-javāñ tak jā.egī

pūchhtā phirtā huuñ maiñ har raah se dīvāna-vār

ziist aa.ī hai kahāñ se aur kahāñ tak jā.egī

maiñ ḳhulūs-e-dil se 'hādī' jab pukārūñgā use

har sadā-e-nā-tavāñ us ke makāñ tak jā.egī

chhuT ke ye qaid-e-makan se la-makan tak jaegi

bahr-e-dil ki mauj bahr-e-be-karan tak jaegi

ek zara mahmez kar phir dekh is ke baal-o-par

fikr ki parwaz baam-e-asman tak jaegi

chupke chupke hi bhaDak uThenge jab andoh-e-gham

chupke chupke aanch bhi qalb-e-tapan tak jaegi

tum jalao to sahi rasiKH yaqin ki mishalen

jurat-e-dil wadi-e-azm-e-jawan tak jaegi

puchhta phirta hun main har rah se diwana-war

zist aai hai kahan se aur kahan tak jaegi

main KHulus-e-dil se 'hadi' jab pukarunga use

har sada-e-na-tawan us ke makan tak jaegi