dagh us bazm mein mehman kahan jata hai

'dāġh' us bazm meñ mehmān kahāñ jaatā hai

terā allāh nigahbān kahāñ jaatā hai

paañv se mere bayābān kahāñ chhuTtā hai

haath se mere garebān kahāñ jaatā hai

ġhair jaatā thā vahāñ maiñ ne ye kah kar rokā

tujh se kuchh jaan na pahchān kahāñ jaatā hai

hijr ke din kī musībat to guzar jā.egī

vasl kī raat kā ehsān kahāñ jaatā hai

ruuTh kar bazm se uTThā to na rokā mujh ko

na kahā us ne kahā maan kahāñ jaatā hai

band karte ho jo hāthoñ se tum āñkheñ merī

kyā kahūñ maiñ ki mirā dhyān kahāñ jaatā hai

'dāġh' tum ne to baḌī dhuum se kī tayyārī

aaj ye iid kā sāmān kahāñ jaatā hai

'dagh' us bazm mein mehman kahan jata hai

tera allah nigahban kahan jata hai

panw se mere bayaban kahan chhuTta hai

hath se mere gareban kahan jata hai

ghair jata tha wahan main ne ye kah kar roka

tujh se kuchh jaan na pahchan kahan jata hai

hijr ke din ki musibat to guzar jaegi

wasl ki raat ka ehsan kahan jata hai

ruTh kar bazm se uTTha to na roka mujh ko

na kaha us ne kaha man kahan jata hai

band karte ho jo hathon se tum aankhen meri

kya kahun main ki mera dhyan kahan jata hai

'dagh' tum ne to baDi dhum se ki tayyari

aaj ye id ka saman kahan jata hai