دیکھ لیتا میں بھی جلوہ شعلۂ رخسار کا

دیکھ لیتا میں بھی جلوہ شعلۂ رخسار کا

رہ گیا دل میں مرے ارماں وصال یار کا

مہ وشوں میں وہ ہے یکتا برق ہے اس کی ادا

قابل تحسیں ہے جلوہ اس جمال یار کا

اک جھلک دکھلا کے وہ روپوش مجھ سے ہو گیا

دل تڑپ کر رہ گیا پھر شوق ہے دیدار کا

روند ڈالے سیکڑوں کے دل خرام ناز سے

ہر طرف چرچا ہے ان کے فتنۂ رفتار کا

کون مونس تھا شب غم میں جو کرتا دل دہی

درد ہی مونس بنا اٹھ کر ترے بیمار کا

اضطراب دل مرا باصرؔ ہوا حد سے سوا

جب نظر کے سامنے آیا وہ جلوہ یار کا