دیکھنا ہے یوں بھی کچھ تسکین پا سکتا ہوں میں

دیکھنا ہے یوں بھی کچھ تسکین پا سکتا ہوں میں

ضبط حسرت ایک دو آنسو بہا سکتا ہوں میں

کوششیں ناکام امیدوں کی دنیا پائمال

زندگی کو زندگی کس طرح پا سکتا ہوں میں

فصل گل مہکی ہوئی راتیں وفور بے خودی

اس فسانے کو حقیقت بھی بنا سکتا ہوں میں

سوچنا تھا اپنی بربادی سے پہلے ہی مجھے

آدمی ہوتے ہوئے ٹھوکر بھی کھا سکتا ہوں میں

فرق نوعیت ہے لیکن عشق بھی مختار ہے

مسکرا سکتے ہیں وہ آنسو بہا سکتا ہوں میں

اب بھی دنیا میں وفا کا نام باقی ہے سحرؔ

بھولنے والے کو اب بھی یاد آ سکتا ہوں میں