diwane hue sahra mein phire ye haal tumhaare gham ne kiya

dīvāne hue sahrā meñ phire ye haal tumhāre ġham ne kiyā

afsos magar is baat kā hai kyā tum ne kiyā kyā ham ne kiyā

jab bhaḌkī hai ātish-e-dāġh-e-jigar sard us ko dīda-e-nam ne kiyā

shādāb chaman meñ phūloñ ko har shām-o-sahar shabnam ne kiyā

achchhī huī ab ki barī ye huī in bātoñ ko ḳhud hī samjho

ilzām hameñ kyā dete ho jo tum ne kahā vo ham ne kiyā

tārīk huī saarī duniyā kyā maut huī mujh bekas kī

kam aise hue haiñ shahīd-e-vafā ġham jin kā ik aalam ne kiyā

qismat kī tarah ye dil na phirā ka.abe se bhī ulTe paañv phire

āñkhoñ meñ galī vo phirne lagī be-ḳhud ye tavāf haram ne kiyā

kyā aisī vafā par naaz karūñ jo baa.is ho rusvā.ī kī

ye baat huī mar jaane kī bad-nām kisī ko sitam ne kiyā

ġhurbat meñ tumhārī turbat par rone ko 'hafīz' aatā koī

ab shukr karo aañsū to puchhe chhiḌkāv bhī abr-e-karam ne kiyā

diwane hue sahra mein phire ye haal tumhaare gham ne kiya

afsos magar is baat ka hai kya tum ne kiya kya hum ne kiya

jab bhaDki hai aatish-e-dagh-e-jigar sard us ko dida-e-nam ne kiya

shadab chaman mein phulon ko har sham-o-sahar shabnam ne kiya

achchhi hui ab ki bari ye hui in baaton ko KHud hi samjho

ilzam hamein kya dete ho jo tum ne kaha wo hum ne kiya

tarik hui sari duniya kya maut hui mujh bekas ki

kam aise hue hain shahid-e-wafa gham jin ka ek aalam ne kiya

qismat ki tarah ye dil na phira kabe se bhi ulTe panw phire

aankhon mein gali wo phirne lagi be-KHud ye tawaf haram ne kiya

kya aisi wafa par naz karun jo bais ho ruswai ki

ye baat hui mar jaane ki bad-nam kisi ko sitam ne kiya

ghurbat mein tumhaari turbat par rone ko 'hafiz' aata koi

ab shukr karo aansu to puchhe chhiDkaw bhi abr-e-karam ne kiya