دل پہ جور و ستم گراں نہ ہوئے

دل پہ جور و ستم گراں نہ ہوئے

کیسے کہہ دوں وہ مہرباں نہ ہوئے

ہائے یادوں کے وہ نقوش حسیں

مٹ گئے اور بے نشاں نہ ہوئے

دیکھنے والے صورت شبنم

صورت بحر بیکراں نہ ہوئے

سوچتا ہوں وہ اشک کیا ہوں گے

جو ابھی زیب داستاں نہ ہوئے

غم تو یہ ہے کہ گلستاں میں سب

پھول کانٹوں کے درمیاں نہ ہوئے

میرے شعروں سے زندگی کے راز

کچھ ہوئے کچھ ابھی عیاں نہ ہوئے

لوگ کچھ بھی کہیں مگر ہم لوگ

رائیگاں ہو کے رائیگاں نہ ہوئے

حوصلہ دیکھ عمر بھر ہم لوگ

زندگی تجھ سے بد گماں نہ ہوئے

سانحہ ہے کہ ان کی محفل میں

آج نشترؔ ہی نغمہ خواں نہ ہوئے