دل صحرا اور آنکھ سمندر یاد میں تیری

دل صحرا اور آنکھ سمندر یاد میں تیری

اک ہنگامہ روح کے اندر یاد میں تیری

مدت گزری خوشیوں سے یارانا ٹوٹا

دکھ ہے مسلسل رنج برابر یاد میں تیری

آنکھیں سونی زلفیں بکھریں لب پہ خموشی

حال ہوا ہے بد سے بد تر یاد میں تیری

چاند کا جھگڑا تاروں سے ہے جانے کب سے

تنہا دھرتی تنہا امبر یاد میں تیری

شام ڈھلے آنکھوں سے بارش رم جھم رم جھم

بھیگ رہے ہیں تکیہ چادر یاد میں تیری

گرد جمی ہے گلیوں میں اور چوباروں میں

دھندلے دھندلے سارے منظر یاد میں تیری

تیری ثناؔ ہے تیرے بنا کچھ ایسے زندہ

خود سے خفا رہتی ہے اکثر یاد میں تیری