aasan-e-haqiqi hai na kuchh sahl-e-majazi

āsān-e-haqīqī hai na kuchh sahl-e-majāzī

ma.alūm huī rāh-e-mohabbat kī darāzī

kuchh lutf o nazar lāzim o malzūm nahīñ haiñ

ik ye bhī tamannā kī na ho sho.abada baazī

dil ḳhuub samajhtā hai tire harf-e-karam ko

har-chand vo urdu hai na turkī hai na taazī

qaa.im hai na vo husn-e-ruḳh-e-yār kā aalam

baaqī hai na vo shauq kī hañgāma-navāzī

ai ishq tirī fat.h bahar-hāl hai sābit

mar kar bhī shahīdān-e-mohabbat hue ġhāzī

kar jald hameñ ḳhatm kahīñ ai ġham-e-jānāñ

kaam aa.egī kis roz tirī sīna-gudāzī

ma.alūm hai duniyā ko ye 'hasrat' kī haqīqat

ḳhalvat meñ vo mai-ḳhvār hai jalvat meñ namāzī

aasan-e-haqiqi hai na kuchh sahl-e-majazi

malum hui rah-e-mohabbat ki daraazi

kuchh lutf o nazar lazim o malzum nahin hain

ek ye bhi tamanna ki na ho shoabada bazi

dil KHub samajhta hai tere harf-e-karam ko

har-chand wo urdu hai na turki hai na tazi

qaim hai na wo husn-e-ruKH-e-yar ka aalam

baqi hai na wo shauq ki hangama-nawazi

ai ishq teri fath bahar-haal hai sabit

mar kar bhi shahidan-e-mohabbat hue ghazi

kar jald hamein KHatm kahin ai gham-e-jaanan

kaam aaegi kis roz teri sina-gudazi

malum hai duniya ko ye 'hasrat' ki haqiqat

KHalwat mein wo mai-KHwar hai jalwat mein namazi