falak pe jitne haiñ taare shumār se bāhar
nikal na jaa.eñ kisī din madār se bāhar
tirī judā.ī kā mausam bhī ḳhūb-sūrat hai
mujhe nikāl rahā hai ḳhumār se bāhar
kisī bhī vaqt ye manzar badalne vaalā hai
dikhā.ī dene lagā hai ġhubār se bāhar
udaas rut hai abhī tak mire ta.āqub meñ
ḳhizāñ ke phuul khile haiñ bahār se bāhar
tire karam se to patthar bhī bol paḌte haiñ
nahīñ hai kuchh bhī vahāñ iḳhtiyār se bāhar
mire vajūd kā gumbad hai TūTne vaalā
nikalne vaalā huuñ maiñ is hisār se bāhar
falak pe jitne hain tare shumar se bahar
nikal na jaen kisi din madar se bahar
teri judai ka mausam bhi KHub-surat hai
mujhe nikal raha hai KHumar se bahar
kisi bhi waqt ye manzar badalne wala hai
dikhai dene laga hai ghubar se bahar
udas rut hai abhi tak mere taaqub mein
KHizan ke phul khile hain bahaar se bahar
tere karam se to patthar bhi bol paDte hain
nahin hai kuchh bhi wahan iKHtiyar se bahar
mere wajud ka gumbad hai TuTne wala
nikalne wala hun main is hisar se bahar
Source :
- Book : Pakistani Adab (Pg. 670)
- Author : Dr. Rashid Amjad
-
Publication : Pakistan Academy of Letters, Islambad, Pakistan
(2009)
- Edition : 2009
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.