فسانہ جور بے حد کا کبھی دہرا نہیں سکتا

فسانہ جور بے حد کا کبھی دہرا نہیں سکتا

کرم حرف شکایت بن کے لب پر آ نہیں سکتا

مرے سوز نہاں کا راز کوئی پا نہیں سکتا

جو دل محسوس کرتا ہے زباں پر آ نہیں سکتا

اگر چاہوں تو جل جائے اشارے میں نقاب ان کا

مگر میں آتش دیدار کو بھڑکا نہیں سکتا

مری فریاد کی ہر لے بعنوان ترنم ہے

نہ سمجھے کوئی میں عشرت کا نغمہ گا نہیں سکتا

اگر ہے شوق نظارہ مذاق دید پیدا کر

بغیر شوق بے حد وہ نظر میں آ نہیں سکتا

سمجھ لیں بحر طوفاں خیز کی نا آشنا موجیں

دل ساحل طلب کو اب ڈبویا جا نہیں سکتا

ہنسے کوئی کوئی روئے یہ اپنی اپنی فطرت ہے

مگر ماہرؔ کا دل غم سے کبھی گھبرا نہیں سکتا