firaq-e-dost mein aisa meri wahshat ka saman tha

firāq-e-dost meñ aisā mirī vahshat kā sāmāñ thā

ki vus.at meñ har ik zarra mire ghar kā bayābāñ thā

batā.e shauq-e-dil us bazm meñ jaanā kuchh āsāñ thā

idhar taqdīr sotī thī udhar bedār darbāñ thā

gale mil kar judā honā mire miTne kā sāmāñ thā

tire jaate hī maiñ dīvāna merā ghar bayābāñ thā

junūn-e-ishq rahbar ho to phir kyā qaid manzil kī

vo majnūñ huuñ ki dasht-e-najd mujh ko har bayābāñ thā

maiñ be-ḳhud thā magar ai josh-e-vahshat hosh hai itnā

mire hāthoñ se ḳhud uljhā huā merā garebāñ thā

vatan kī ḳhaak tujh ko yaad kar ke ham bahut ro.e

ki tujh se duur the aur shām-e-ġhurbat thī bayābāñ thā

kisī se apnī barbādī kā shikva kyā karūñ 'sāqib'

ki merā hī dil-e-vārafta merā dushman-e-jāñ thā

firaq-e-dost mein aisa meri wahshat ka saman tha

ki wusat mein har ek zarra mere ghar ka bayaban tha

batae shauq-e-dil us bazm mein jaana kuchh aasan tha

idhar taqdir soti thi udhar bedar darban tha

gale mil kar juda hona mere miTne ka saman tha

tere jate hi main diwana mera ghar bayaban tha

junun-e-ishq rahbar ho to phir kya qaid manzil ki

wo majnun hun ki dasht-e-najd mujh ko har bayaban tha

main be-KHud tha magar ai josh-e-wahshat hosh hai itna

mere hathon se KHud uljha hua mera gareban tha

watan ki KHak tujh ko yaad kar ke hum bahut roe

ki tujh se dur the aur sham-e-ghurbat thi bayaban tha

kisi se apni barbaadi ka shikwa kya karun 'saqib'

ki mera hi dil-e-warafta mera dushman-e-jaan tha