gham kisi ghair ka bekar nahin karna hai

ġham kisī ġhair kā bekār nahīñ karnā hai

yuuñ tamāshā sar-e-bāzār nahīñ karnā hai

lan-tarānī kī sadā bhī unheñ denī na paḌe

ham hī kah dete haiñ dīdār nahīñ karnā hai

be-gunāhī kā mire raaz na khulne paa.e

koī hangāma sar-e-dār nahīñ karnā hai

yā'nī daasī ke liye shaah banegā dushman

kyā kahā bai'at-e-sardār nahīñ karnā hai

mujh se kahtā hai mirī baat karo logoñ se

ye bhī kahtā hai lagātār nahīñ karnā hai

kam se kam yaad rahe un se ulajh kar ham ko

āḳhirī rāsta dushvār nahīñ karnā hai

tū bhī jaane hai maiñ munkir huuñ ka.ī chīzoñ kā

par tirī zaat kā inkār nahīñ karnā hai

gham kisi ghair ka bekar nahin karna hai

yun tamasha sar-e-bazar nahin karna hai

lan-tarani ki sada bhi unhen deni na paDe

hum hi kah dete hain didar nahin karna hai

be-gunahi ka mere raaz na khulne pae

koi hangama sar-e-dar nahin karna hai

ya'ni dasi ke liye shah banega dushman

kya kaha bai'at-e-sardar nahin karna hai

mujh se kahta hai meri baat karo logon se

ye bhi kahta hai lagatar nahin karna hai

kam se kam yaad rahe un se ulajh kar hum ko

aaKHiri rasta dushwar nahin karna hai

tu bhi jaane hai main munkir hun kai chizon ka

par teri zat ka inkar nahin karna hai