ghunche ne ki jo us se tul-e-kalam ki baat

ġhunche ne kī jo us se tūl-e-kalām kī baat

bulbul ye sun ke bolī chhoTā tū muñh baḌī baat

vo kān-e-ḳhāmushī huuñ gosh-e-samā.at-āgīñ

suntā huuñ sab kī apnī kahtā nahīñ koī baat

bulbul na rāz-e-dil kah dīvār-e-gosh vārid

niklī jo muñh se bāhar chhuptī nahīñ kabhī baat

tārīf us dahan kī pārīna kī to kyā kī

sunñe se tāzgī ho itnī to ho na.ī baat

ḳhāmoshī-e-butāñ kā baa.is ye barhaman hai

Dar hai kahīñ na nikle muñh se burī-bhalī baat

vo mard-e-rāst-go huuñ misl-e-qalam jahāñ meñ

gar do bhī hoñ zabāneñ nikle na dūsrī baat

mar bhī ga.e barahman bātoñ kī hasratoñ meñ

bole sanam na muñh se kahne ko rah ga.ī baat

ai 'shād' ḳhairiyat ho bulbul ke musht-e-par kī

bād-e-sabā bhī aa.ī sun kar uḌī-paḌī baat

ghunche ne ki jo us se tul-e-kalam ki baat

bulbul ye sun ke boli chhoTa tu munh baDi baat

wo kan-e-KHamushi hun gosh-e-samaat-agin

sunta hun sab ki apni kahta nahin koi baat

bulbul na raaz-e-dil kah diwar-e-gosh warid

nikli jo munh se bahar chhupti nahin kabhi baat

tarif us dahan ki parina ki to kya ki

sunne se tazgi ho itni to ho nai baat

KHamoshi-e-butan ka bais ye barhaman hai

Dar hai kahin na nikle munh se buri-bhali baat

wo mard-e-rast-go hun misl-e-qalam jahan mein

gar do bhi hon zabanen nikle na dusri baat

mar bhi gae barahman baaton ki hasraton mein

bole sanam na munh se kahne ko rah gai baat

ai 'shad' KHairiyat ho bulbul ke musht-e-par ki

baad-e-saba bhi aai sun kar uDi-paDi baat