hae dam bhar bhi dil Thahar na saka

haa.e dam bhar bhī dil Thahar na sakā

haath siine pe koī dhar na sakā

ā.īna kis se dekhā jaatā hai

rashk ke maare vo sañvar na sakā

rah gayā aañkh meñ nazākat se

dil meñ naqsha tirā utar na sakā

vus.at-e-zarf se rahā mahrūm

jaam merā kisī se bhar na sakā

is jahāñ se guzar ga.e lākhoñ

is galī se koī guzar na sakā

mai-kashī se najāt mushkil hai

mai kā Duubā kabhī ubhar na sakā

ashk jaarī the yād-e-gesū meñ

raat bhar qāfila Thahar na sakā

mausam-e-gul meñ bhī 'jalīl' afsos

dāman apnā guloñ se bhar na sakā

hae dam bhar bhi dil Thahar na saka

hath sine pe koi dhar na saka

aaina kis se dekha jata hai

rashk ke mare wo sanwar na saka

rah gaya aankh mein nazakat se

dil mein naqsha tera utar na saka

wusat-e-zarf se raha mahrum

jam mera kisi se bhar na saka

is jahan se guzar gae lakhon

is gali se koi guzar na saka

mai-kashi se najat mushkil hai

mai ka Duba kabhi ubhar na saka

ashk jari the yaad-e-gesu mein

raat bhar qafila Thahar na saka

mausam-e-gul mein bhi 'jalil' afsos

daman apna gulon se bhar na saka