ہم بیگانے ہو جائیں گے

ہم بیگانے ہو جائیں گے

سچ افسانے ہو جائیں گے

دیکھنے والو جی بھر دیکھو

پھر تو زمانے ہو جائیں گے

قصے تازہ دم رہتے ہیں

لوگ پرانے ہو جائیں گے

وقت رخصت جانتے نہ تھے

دور ٹھکانے ہو جائیں گے

اتنی محبت کرنے والے

ہاں دیوانے ہو جائیں گے

ہر سچ کا اظہار نہ کرنا

سب انجانے ہو جائیں گے

وہ چاہیں تو مشکل کیا ہے

لاکھ بہانے ہو جائیں گے

جاں قربان تو ہوگی ہی جب

دل نذرانے ہو جائیں گے

ہم کو تو امید تھی عامرؔ

آپ سیانے ہو جائیں گے