hanuz dard-e-judai-e-yar baqi hai

hanūz dard-e-judā.ī-e-yār baaqī hai

khaTak rahā thā jo dil meñ vo ḳhaar baaqī hai

na qais hai na vo mahmil-savār baaqī hai

bas ik ġhubār faqat yādgār baaqī hai

sharāb-e-aish kisī shab huī thī mujh ko nasīb

usī sharāb kā ab tak ḳhumār baaqī hai

kabhī to shām-e-musībat kī sub.h aa.egī

agar ye gardish-e-lail-o-nahār baaqī hai

nigāh-e-lutf se saaqī hamīñ raheñ mahrūm

udhar bhī dekh ik ummīd-vār baaqī hai

bahār aa.egī phir 'yās' nā-umīd na ho

abhī to gulshan-e-nā-pā.edār baaqī hai

hanuz dard-e-judai-e-yar baqi hai

khaTak raha tha jo dil mein wo KHar baqi hai

na qais hai na wo mahmil-sawar baqi hai

bas ek ghubar faqat yaadgar baqi hai

sharab-e-aish kisi shab hui thi mujh ko nasib

usi sharab ka ab tak KHumar baqi hai

kabhi to sham-e-musibat ki subh aaegi

agar ye gardish-e-lail-o-nahaar baqi hai

nigah-e-lutf se saqi hamin rahen mahrum

udhar bhi dekh ek ummid-war baqi hai

bahaar aaegi phir 'yas' na-umid na ho

abhi to gulshan-e-na-paedar baqi hai