حق پرستان جہاں برسر باطل ٹھہرے

حق پرستان جہاں برسر باطل ٹھہرے

کس کی ہمت ہے کہ اس بت کے مقابل ٹھہرے

آپ رہبر ہی سہی پھر بھی یہ اصرار ہے کیوں

آپ کی سمت نظر جادۂ منزل ٹھہرے

ہم اگر نام لیں ساحل کا تو گردن زدنی

آپ فرما دیں تو گرداب بھی ساحل ٹھہرے

کیا قیامت ہے کہ وہ لوگ جو خود بسمل تھے

عدل و انصاف کی میزان میں قابل ٹھہرے

ہم سزا وار کرم تھے کہ نہ تھے کیسے کہیں

سینکڑوں ہم میں سے تعزیر کے قابل ٹھہرے

سینکڑوں ہو گئے گم وادیٔ گمنامی میں

صرف دوچار ہی شائستۂ منزل ٹھہرے

کون جانے کہ یہی سوزؔ کی معصوم غزل

ایک انگارہ پئے خرمن باطل ٹھہرے