ہوائے دیر و حرم سے بچانا پڑتا ہے

ہوائے دیر و حرم سے بچانا پڑتا ہے

خدا کو سینے کے اندر چھپانا پڑتا ہے

قدم قدم پہ لپٹتی ہے خاک قدموں سے

اور آسمان کو سر پر اٹھانا پڑتا ہے

شب سیاہ کا محرم نہیں ہوا اب تک

بہ وقت شام یہ سورج بجھانا پڑتا ہے

فرشتہ ہونے سے مشکل ہے آدمی ہونا

کہ آدمی کو زمینوں پہ آنا پڑتا ہے

ادھر چلے ہو تو پتھر بھی ہاتھ میں لے لو

کہ راستے میں اک آئینہ خانہ پڑتا ہے

بتائیں آپ ہی جنت میں کس طرح جائیں

ہمیں تو دانۂ گندم بھی کھانا پڑتا ہے