hua chali to mere jism ne kaha mujhko

havā chalī to mire jism ne kahā mujh ko

akelā chhoḌ ke tū bhī kahāñ chalā mujh ko

maiñ kab se DhūñDhtā phirtā huuñ apnī qismat ko

ye tere haath meñ kyā hai zarā dikhā mujh ko

dahaktī jaltī huī dopahar milī lekin

kisī daraḳht kā saayā na mil sakā mujh ko

maiñ apne room kī battī jalā.e baiThā huuñ

are ye shaam se pahle hī kyā huā mujh ko

balā ke shor meñ Duubī huī sadā huuñ maiñ

kisī se kyā kahūñ maiñ ne bhī kab sunā mujh ko

vo koī aur hai 'alvī' jo sher kahtā hai

tum is ke jurm kī dete ho kyuuñ sazā mujh ko

hawa chali to mere jism ne kaha mujh ko

akela chhoD ke tu bhi kahan chala mujh ko

main kab se DhunDhta phirta hun apni qismat ko

ye tere hath mein kya hai zara dikha mujh ko

dahakti jalti hui dopahar mili lekin

kisi daraKHt ka saya na mil saka mujh ko

main apne room ki batti jalae baiTha hun

are ye sham se pahle hi kya hua mujh ko

bala ke shor mein Dubi hui sada hun main

kisi se kya kahun main ne bhi kab suna mujh ko

wo koi aur hai 'alwi' jo sher kahta hai

tum is ke jurm ki dete ho kyun saza mujh ko