حسن پرستی حضرت ناصح آپ کے بس کی بات نہیں

حسن پرستی حضرت ناصح آپ کے بس کی بات نہیں

اپنا اپنا ظرف نظر ہے عشق و ہوس کی بات نہیں

اف وہ اسیر رہائی جس کی بس میں نہیں صیاد کے بھی

قید وفا كا ذکر ہے ہمدم دام و قفس کی بات نہیں

قافلۂ ارباب جنوں میں چھوڑ کے منزل ہم کیوں آئے

وحشت دل کی مجبوری تھی بانگ جرس کی بات نہیں

رحم نہ کیجئے سن تو لیجئے اتنا ستم بھی ٹھیک نہیں

اہل وفا کا افسانہ ہے مور و مگس کی بات نہیں

دل والوں کی سرگردانی گلشن میں بھونروں کی طرح

خون جگر کا افسانہ ہے پھول کے رس کی بات نہیں

مدہوشی کی جو بھی سزا ہو جور فزوں یا ہجر دوام

آپ کے آگے ہوش میں رہنا اپنے بس کی بات نہیں

ہم پہ ستم تو ٹھیک ہے یارب ان کا دشمن کیوں ہے جہاں

لالہ و گل کا حق ہے چمن پر خار و خس کی بات نہیں

وادیٔ ایمن بن سکتی ہے شعلۂ نے سے بزم طرب

سوز سراپا بن جاتا ہے سوز نفس کی بات نہیں

ابر کرم کا ذکر نہ کیجئے آتش غم ہے قسمت سوز

تا دم آخر جلنا ہے دو چار برس کی بات نہیں