ek Dhab pe kabhu wo but-e-KHud-kaam na paya

ik Dhab pe kabhū vo but-e-ḳhud-kām na paayā

dekhā meñ jo kuchh sub.h use shaam na paayā

apnī hī havas ke ye sab uljhāv haiñ varna

is raah meñ ham ne to kahīñ daam na paayā

vo naḳhl-e-ḳhizāñ-dīda huuñ us dasht meñ jis ke

saaye meñ kisī pahuñche ne bisrām na paayā

vo be-sar-o-tan hai ye zamāna ki ba-īñ-ġhaur

jis kā maiñ kuchh āġhāz aur anjām na paayā

fahrist meñ ḳhūbān-e-vafādār kī pyāre

dekhī to kahīñ us meñ tirā naam na paayā

ma.amūl thā dushnām evaz apnī duā kā

so vo bhī ka.ī din se maiñ in.aam na paayā

yak shab vo kahīñ god meñ soyā thā so 'qā.em'

phir bālish-e-maḳhmal se maiñ ārām na paayā

ek Dhab pe kabhu wo but-e-KHud-kaam na paya

dekha mein jo kuchh subh use sham na paya

apni hi hawas ke ye sab uljhaw hain warna

is rah mein hum ne to kahin dam na paya

wo naKHl-e-KHizan-dida hun us dasht mein jis ke

saye mein kisi pahunche ne bisram na paya

wo be-sar-o-tan hai ye zamana ki ba-in-ghaur

jis ka main kuchh aaghaz aur anjam na paya

fahrist mein KHuban-e-wafadar ki pyare

dekhi to kahin us mein tera nam na paya

mamul tha dushnam ewaz apni dua ka

so wo bhi kai din se main inam na paya

yak shab wo kahin god mein soya tha so 'qaem'

phir baalish-e-maKHmal se main aaram na paya