ek nadi mauj-dar-mauj pahlu badalti rahi

ik nadī mauj-dar-mauj pahlū badaltī rahī

ek kashtī baḌe rakh-rakhāv se chaltī rahī

ik parinda huā āb-o-dāne kī ḳhvāhish meñ gum

ek Tahnī ke dukh meñ havā haath maltī rahī

ik sitāra kahīñ āsmāñ par ulajhtā rahā

ek añgnā.ī meñ rāt-bhar aag jaltī rahī

ik shajar shāḳh se shāḳh ke fāsloñ par jiyā

ek dīvār do ghar bichhaḌne se paltī rahī

ik sadā ne ka.ī jaal sahrāoñ par bun diye

ek sargoshī ābādiyoñ ko nigaltī rahī

ik masāfat mukammal huī niiñd hī niiñd meñ

ek sapne meñ din kī thakan pankh jhaltī rahī

ik darīcha bulātā rahā apnī āġhosh meñ

ek āvārgī ghar se le kar nikaltī rahī

ek nadi mauj-dar-mauj pahlu badalti rahi

ek kashti baDe rakh-rakhaw se chalti rahi

ek parinda hua aab-o-dane ki KHwahish mein gum

ek Tahni ke dukh mein hawa hath malti rahi

ek sitara kahin aasman par ulajhta raha

ek angnai mein raat-bhar aag jalti rahi

ek shajar shaKH se shaKH ke faslon par jiya

ek diwar do ghar bichhaDne se palti rahi

ek sada ne kai jal sahraon par bun diye

ek sargoshi aabaadiyon ko nigalti rahi

ek masafat mukammal hui nind hi nind mein

ek sapne mein din ki thakan pankh jhalti rahi

ek daricha bulata raha apni aaghosh mein

ek aawargi ghar se le kar nikalti rahi