insan ke kitne rup hain ru-e-ana se puchh

insāñ ke kitne ruup haiñ rū-e-anā se pūchh

sāz-e-ġharaz se maslahat-e-ḳhushnumā se pūchh

tere safar kī raah meñ kitne sarāb haiñ

merī nigah se pūchh mire naqsh-e-pā se pūchh

kitne haiñ saañp hujra-e-iḳhlās meñ na gin

mailī ridā se pūchh darīda qabā se pūchh

ik sirf tere qasr pe bijlī girī thī kyuuñ

mat pūchh us ke adl se apnī ḳhatā se pūchh

kyā kyā milā hai zindagī-e-be-sabāt se

kaliyoñ se pūchh ġhuncha-e-rañgīñ-adā se pūchh

aasī kī kyā shanāḳht hai ma.asūm kī hai kyā

ye baat bārgāh-e-sazā-o-jazā se pūchh

itnī kaḌī thī dhuup tire rāste meñ kyuuñ

'hādī' ye aaj ḳhāliq-e-karbobalā se pūchh

insan ke kitne rup hain ru-e-ana se puchh

saz-e-gharaz se maslahat-e-KHushnuma se puchh

tere safar ki rah mein kitne sarab hain

meri nigah se puchh mere naqsh-e-pa se puchh

kitne hain sanp hujra-e-iKHlas mein na gin

maili rida se puchh darida qaba se puchh

ek sirf tere qasr pe bijli giri thi kyun

mat puchh us ke adl se apni KHata se puchh

kya kya mila hai zindagi-e-be-sabaat se

kaliyon se puchh ghuncha-e-rangin-ada se puchh

aasi ki kya shanaKHt hai masum ki hai kya

ye baat bargah-e-saza-o-jaza se puchh

itni kaDi thi dhup tere raste mein kyun

'hadi' ye aaj KHaliq-e-karbobala se puchh