اس تعلق کو نبھاؤ تو کوئی شعر کہوں

اس تعلق کو نبھاؤ تو کوئی شعر کہوں

تم اگر سامنے آؤ تو کوئی شعر کہوں

ڈوب جانے پہ ہی گہرائی پتہ چلتی ہے

آنکھ سے آنکھ ملاؤ تو کوئی شعر کہوں

میں کسی مونالیزا کا نہیں قائل جاناں

اپنی تصویر دکھاؤ تو کوئی شعر کہوں

آپ کی چپ سے ہیں خاموش فضائیں ساری

آپ ہونٹوں کو ہلاؤ تو کوئی شعر کہوں

تم ستاروں کو گنو اور میں دیکھوں تم کو

ساتھ اک رات بتاؤ تو کوئی شعر کہوں

حضرت قیس کو کل شہر میں دیکھا تو کہا

دشت میں خاک اڑاؤ تو کوئی شعر کہوں

وصل کے دور میں کب شعر ہوا کرتے ہیں

تم مجھے چھوڑ کے جاؤ تو کوئی شعر کہوں