ishq mein rah se jo lauT ke ghar jata hai

'ishq meñ raah se jo lauT ke ghar jaatā hai

zindagī-bhar ko pas-e-kūcha-o-dar jaatā hai

log is shahr ke ab kam hī du'ā māñgte haiñ

chāñd is shahr se ab yūñhī guzar jaatā hai

hijr meñ aise añdhere bhī na dekhe koī

dil muñDeroñ pe diye dekh ke Dar jaatā hai

roz chaḌh jaatī hai ik aur parat sūraj kī

roz dīvār se ik saaya utar jaatā hai

kaisī nīñdeñ haiñ ki band āñkheñ jagātī haiñ mujhe

kaisā sapnā hai ki har raat bikhar jaatā hai

yuuñ guzartā hai bas ab dil se tire vasl kā dhyān

jaise pardes meñ tyauhār guzar jaatā hai

kāsa-e-ranj hamesha rahā labrez 'jamāl'

aañkh ḳhālī ho to dil dard se bhar jaatā hai

'ishq mein rah se jo lauT ke ghar jata hai

zindagi-bhar ko pas-e-kucha-o-dar jata hai

log is shahr ke ab kam hi du'a mangte hain

chand is shahr se ab yunhi guzar jata hai

hijr mein aise andhere bhi na dekhe koi

dil munDeron pe diye dekh ke Dar jata hai

roz chaDh jati hai ek aur parat suraj ki

roz diwar se ek saya utar jata hai

kaisi ninden hain ki band aankhen jagati hain mujhe

kaisa sapna hai ki har raat bikhar jata hai

yun guzarta hai bas ab dil se tere wasl ka dhyan

jaise pardes mein tyauhaar guzar jata hai

kasa-e-ranj hamesha raha labrez 'jamal'

aankh KHali ho to dil dard se bhar jata hai