itna manus hai dil aap ke afsane se

itnā mānūs hai dil aap ke afsāne se

ab kisī taur bahaltā nahīñ bahlāne se

jām-o-mīnā ke ta.ayyun se hai baalā saaqī

zarf dekhā nahīñ jaatā kisī paimāne se

aao tajdīd-e-vafā phir se kareñ ham varna

baat kuchh aur ulajh jā.egī suljhāne se

hai samajhnā to mohabbat se guzar ai hamdam

baat aa.egī samajh meñ na yuuñ samjhāne se

ab na chāheñge kisī aur ko taslīm magar

fā.eda kyā hai mire sar kī qasam khāne se

maiñ tahī-hosh sahī aap kā irshād bajā

aap bekār ulajhne lage dīvāne se

'ārzū' shikva-ba-lab ho to rahe ho lekin

fā.eda guzrī huī baat ko dohrāne se

itna manus hai dil aap ke afsane se

ab kisi taur bahalta nahin bahlane se

jam-o-mina ke tayyun se hai baala saqi

zarf dekha nahin jata kisi paimane se

aao tajdid-e-wafa phir se karen hum warna

baat kuchh aur ulajh jaegi suljhane se

hai samajhna to mohabbat se guzar ai hamdam

baat aaegi samajh mein na yun samjhane se

ab na chahenge kisi aur ko taslim magar

faeda kya hai mere sar ki qasam khane se

main tahi-hosh sahi aap ka irshad baja

aap bekar ulajhne lage diwane se

'arzu' shikwa-ba-lab ho to rahe ho lekin

faeda guzri hui baat ko dohrane se