izhaar-e-sadaqat mein asar kyon nahin hota

iz.hār-e-sadāqat meñ asar kyoñ nahīñ hotā

ab merī taraf un kā guzar kyoñ nahīñ hotā

ḳhushbū kā ye bikhrāv bhī tauhīn-e-chaman hai

ehsās tujhe bād-e-sahar kyoñ nahīñ hotā

kyoñ fikr se mahrūm haiñ is daur kī nasleñ

pahlā sā zabānoñ meñ asar kyoñ nahīñ hotā

jo baat idhar hai vo udhar kyoñ nahīñ jaatī

jo karb idhar hai vo udhar kyoñ nahīñ hotā

is shahr-e-zabūñ-hāl meñ taḳhrīb kā ehsās

honā to zarūrī hai magar kyoñ nahīñ hotā

fankār isī kashmakash-e-vaqt meñ gum haiñ

bāzār ḳharīdār-e-hunar kyoñ nahīñ hotā

allāh ko karte haiñ musībat meñ sabhī yaad

ye vird magar shām-o-sahar kyoñ nahīñ hotā

ḳhud-bīñ haiñ sabhī aur ye batāne se haiñ mā’zūr

ā.īne se nuqsān-e-nazar kyoñ nahīñ hotā

peshānī-e-kohsār pe sūraj kā hai mīlād

vaadī meñ magar shor-e-sahar kyoñ nahīñ hotā

ho jis ke payambar kā guzar ‘arsh-e-barīñ par

ummat kā sitāroñ meñ safar kyoñ nahīñ hotā

hairāñ huuñ ki 'iqbāl' kī tā'līm kā 'dānish'

is shahr ke logoñ pe asar kyoñ nahīñ hotā

izhaar-e-sadaqat mein asar kyon nahin hota

ab meri taraf un ka guzar kyon nahin hota

KHushbu ka ye bikhraw bhi tauhin-e-chaman hai

ehsas tujhe baad-e-sahar kyon nahin hota

kyon fikr se mahrum hain is daur ki naslen

pahla sa zabanon mein asar kyon nahin hota

jo baat idhar hai wo udhar kyon nahin jati

jo karb idhar hai wo udhar kyon nahin hota

is shahr-e-zabun-haal mein taKHrib ka ehsas

hona to zaruri hai magar kyon nahin hota

fankar isi kashmakash-e-waqt mein gum hain

bazar KHaridar-e-hunar kyon nahin hota

allah ko karte hain musibat mein sabhi yaad

ye wird magar sham-o-sahar kyon nahin hota

KHud-bin hain sabhi aur ye batane se hain ma’zur

aaine se nuqsan-e-nazar kyon nahin hota

peshani-e-kohsar pe suraj ka hai milad

wadi mein magar shor-e-sahar kyon nahin hota

ho jis ke payambar ka guzar ‘arsh-e-barin par

ummat ka sitaron mein safar kyon nahin hota

hairan hun ki 'iqbaal' ki ta'lim ka 'danish'

is shahr ke logon pe asar kyon nahin hota