jab se humne bazuon mein zor paida kar liya

jab se ham ne bāzuoñ meñ zor paidā kar liyā

jism-o-jāñ kī ḳhāmushī meñ shor paidā kar liyā

ruuh meñ chamke 'ajab kuchh rang is barsāt meñ

ham ne bhī jangal meñ apnā mor paidā kar liyā

ho gayā thā jam' āñkhoñ meñ bahut ḳhvāboñ kā maal

chashm-e-tar kī shakl meñ ik chor paidā kar liyā

jangaloñ ko kaaT kar kaisā ġhazab ham ne kiyā

shahr jaisā ek ādam-ḳhor paidā kar liyā

matla’-e-jāñ har ghaḌī rahtā hai abr-ālūd-e-she'r

ham ne ye bādal 'ajab ghanghor paidā kar liyā

ek khiḌkī sī khulī rakkhī hai duniyā kī taraf

ik baḌā darvāza apnī or paidā kar liyā

ham rahe 'ehsās' jī ke halqa-e-tadrīs meñ

apne she'roñ meñ balā kā zor paidā kar liyā

jab se hum ne bazuon mein zor paida kar liya

jism-o-jaan ki KHamushi mein shor paida kar liya

ruh mein chamke 'ajab kuchh rang is barsat mein

hum ne bhi jangal mein apna mor paida kar liya

ho gaya tha jam' aankhon mein bahut KHwabon ka mal

chashm-e-tar ki shakl mein ek chor paida kar liya

jangalon ko kaT kar kaisa ghazab hum ne kiya

shahr jaisa ek aadam-KHor paida kar liya

matla’-e-jaan har ghaDi rahta hai abr-alud-e-she'r

hum ne ye baadal 'ajab ghanghor paida kar liya

ek khiDki si khuli rakkhi hai duniya ki taraf

ek baDa darwaza apni or paida kar liya

hum rahe 'ehsas' ji ke halqa-e-tadris mein

apne she'ron mein bala ka zor paida kar liya