jahan badalne ka wo bhi guman rakhte hain

jahāñ badalne kā vo bhī gumān rakhte haiñ

jo ghar ke naqshe meñ pahle dukān rakhte haiñ

ham apne jism meñ rakhte haiñ ik zamīñ kī mahak

ham apnī ruuh meñ ik āsmān rakhte haiñ

mire ḳhudā ne vo dushman mujhe nasīb kiye

jo apne tiir se chhoTī kamān rakhte haiñ

kisī kī nīm-nigāhī se jalne lagtā hai

vo jis charāġh meñ ham apnī jaan rakhte haiñ

'abas hai un se tavaqqo' koī zamāne meñ

jo log nashshe meñ bhī apnā dhyān rakhte haiñ

har anjuman meñ alag se dikhā.ī dete haiñ

koī fazā ho ham apnī uḌaan rakhte haiñ

hameñ kisī shajar-e-rāh par bharosa nahīñ

kisī kī zulf ko ham sā.ebān rakhte haiñ

jahan badalne ka wo bhi guman rakhte hain

jo ghar ke naqshe mein pahle dukan rakhte hain

hum apne jism mein rakhte hain ek zamin ki mahak

hum apni ruh mein ek aasman rakhte hain

mere KHuda ne wo dushman mujhe nasib kiye

jo apne tir se chhoTi kaman rakhte hain

kisi ki nim-nigahi se jalne lagta hai

wo jis charagh mein hum apni jaan rakhte hain

'abas hai un se tawaqqo' koi zamane mein

jo log nashshe mein bhi apna dhyan rakhte hain

har anjuman mein alag se dikhai dete hain

koi faza ho hum apni uDan rakhte hain

hamein kisi shajar-e-rah par bharosa nahin

kisi ki zulf ko hum saeban rakhte hain