jalwa-e-saqi-o-mai jaan liye lete hain

jalva-e-sāqī-o-mai jaan liye lete haiñ

shaiḳh jī zabt kareñ ham to piye lete haiñ

dil meñ yaad un kī jo aate hue sharmātī hai

dard uThtā hai ki ham aaḌ kiye lete haiñ

daur-e-tahzīb meñ pariyoñ kā huā duur naqāb

ham bhī ab chāk-e-garebāñ ko siye lete haiñ

ḳhud-kushī man' ḳhushī gum ye qayāmat hai magar

jiinā hī kitnā hai ab ḳhair jiye lete haiñ

muddat-e-vasl ko parvāne se pūchheñ ushshāq

vo maza kyā hai jo be-jān-diye lete haiñ

jalwa-e-saqi-o-mai jaan liye lete hain

shaiKH ji zabt karen hum to piye lete hain

dil mein yaad un ki jo aate hue sharmati hai

dard uThta hai ki hum aaD kiye lete hain

daur-e-tahzib mein pariyon ka hua dur naqab

hum bhi ab chaak-e-gareban ko siye lete hain

KHud-kushi man' KHushi gum ye qayamat hai magar

jina hi kitna hai ab KHair jiye lete hain

muddat-e-wasl ko parwane se puchhen ushshaq

wo maza kya hai jo be-jaan-diye lete hain