jaras hai karwan-e-ahl-e-alam mein fughan meri

jaras hai kārvān-e-ahl-e-ālam meñ fuġhāñ merī

jagā detī hai duniyā ko sadā-e-al-amāñ merī

tasavvur meñ vo kuchh barham se haiñ kuchh mehrbāñ se haiñ

unheñ shāyad sunā.ī jā rahī hai dāstāñ merī

har ik zarra hai sahrā aur har sahrā hai ik duniyā

magar is vus.at-e-ālam meñ gunjā.ish kahāñ merī

mirī hairat pe vo tanqīd kī taklīf karte haiñ

jinheñ ye bhī nahīñ ma.alūm nazreñ haiñ kahāñ merī

musalsal thā fareb-e-ḳhvāb-gāh-e-ālam-e-fānī

magar sotā rahā chaltī rahī umr-e-ravāñ merī

vahī lamha varūd-e-nā-gahāñ kā un ke ho shāyad

jatā kar aa.e jab bhī aa.e marg-e-nā-gahāñ merī

mazāq-e-ham-zabānī ko na tarsūñ bāġh-e-jannat meñ

koī 'sīmāb' hūroñ ko sikhā detā zabāñ merī

jaras hai karwan-e-ahl-e-alam mein fughan meri

jaga deti hai duniya ko sada-e-al-aman meri

tasawwur mein wo kuchh barham se hain kuchh mehrban se hain

unhen shayad sunai ja rahi hai dastan meri

har ek zarra hai sahra aur har sahra hai ek duniya

magar is wusat-e-alam mein gunjaish kahan meri

meri hairat pe wo tanqid ki taklif karte hain

jinhen ye bhi nahin malum nazren hain kahan meri

musalsal tha fareb-e-KHwab-gah-e-alam-e-fani

magar sota raha chalti rahi umr-e-rawan meri

wahi lamha warud-e-na-gahan ka un ke ho shayad

jata kar aae jab bhi aae marg-e-na-gahan meri

mazaq-e-ham-zabani ko na tarsun bagh-e-jannat mein

koi 'simab' huron ko sikha deta zaban meri