jise bhi hon adab-adab dekh sakta hai

jise bhī hoñ adab-ādāb dekh saktā hai

koī bhī shaḳhs tire ḳhvāb dekh saktā hai

tirī nigāh se duniyā ko dekhne vaalā

charāġh ko pas-e-mehrāb dekh saktā hai

ye kah ke izn-e-safar de diyā gayā mujh ko

ki tū sitāre ko mahtāb dekh saktā hai

du'ā-o-ashk kī gaThrī sañbhāl ke rakhnā

kisī bhī vaqt vo asbāb dekh saktā hai

vo jis ne dekh liyā hai use nazar-bhar ke

pas-e-ġhubār-o-tah-e-āb dekh saktā hai

na apne hijr meñ pazhmurda pā ke ḳhush hai hameñ

na apne vasl meñ shādāb dekh saktā hai

na chāhtā hai ki ham hālat-e-sukūñ meñ raheñ

na apne 'ishq meñ betāb dekh saktā hai

'jamāl' jis ko bhī shak ho hamārī bātoñ par

hamārā halqa-e-ahbāb dekh saktā hai

jise bhi hon adab-adab dekh sakta hai

koi bhi shaKHs tere KHwab dekh sakta hai

teri nigah se duniya ko dekhne wala

charagh ko pas-e-mehrab dekh sakta hai

ye kah ke izn-e-safar de diya gaya mujh ko

ki tu sitare ko mahtab dekh sakta hai

du'a-o-ashk ki gaThri sanbhaal ke rakhna

kisi bhi waqt wo asbab dekh sakta hai

wo jis ne dekh liya hai use nazar-bhar ke

pas-e-ghubar-o-tah-e-ab dekh sakta hai

na apne hijr mein pazhmurda pa ke KHush hai hamein

na apne wasl mein shadab dekh sakta hai

na chahta hai ki hum haalat-e-sukun mein rahen

na apne 'ishq mein betab dekh sakta hai

'jamal' jis ko bhi shak ho hamari baaton par

hamara halqa-e-ahbab dekh sakta hai