jo haq pe chalta hai sach ka nishan khinchta hai

jo haq pe chaltā hai sach kā nishān khīñchtā hai

usī kī khaal to saarā jahān khīñchtā hai

savār asp kī jaise ‘inān khīñchtā hai

mirī ḳhatā pe vo vaise hī kaan khīñchtā hai

maiñ us ke sāmne sīna-sipar hī rahtā huuñ

vo jab kamīn se apnā kamān khīñchtā hai

vo pahle sāmne rakkhe kisān kā ḳhāka

agar kahīñ koī tasvīr naan khīñchtā hai

kisī mahāz pe jab bhī nikalnā chāhtā huuñ

to mere paañv ko kul ḳhāndān khīñchtā hai

hamīñ muhāfiz-e-nāmūs-e-'ishq-o-'irfāñ haiñ

hamīñ pe har koī teġh-o-sinān khīñchtā hai

kisī bhī haal meñ martā nahīñ mirā kirdār

koī jo silsila-e-dāstān khīñchtā hai

maiñ ek aisā hī ḳhāna-ba-dosh huuñ 'sāqib'

jo apne haath se apnā makān khīñchtā hai

jo haq pe chalta hai sach ka nishan khinchta hai

usi ki khaal to sara jahan khinchta hai

sawar asp ki jaise ‘inan khinchta hai

meri KHata pe wo waise hi kan khinchta hai

main us ke samne sina-sipar hi rahta hun

wo jab kamin se apna kaman khinchta hai

wo pahle samne rakkhe kisan ka KHaka

agar kahin koi taswir nan khinchta hai

kisi mahaz pe jab bhi nikalna chahta hun

to mere panw ko kul KHandan khinchta hai

hamin muhafiz-e-namus-e-'ishq-o-'irfan hain

hamin pe har koi tegh-o-sinan khinchta hai

kisi bhi haal mein marta nahin mera kirdar

koi jo silsila-e-dastan khinchta hai

main ek aisa hi KHana-ba-dosh hun 'saqib'

jo apne hath se apna makan khinchta hai