جو ہوگی صبح تو لوٹیں گے شام سے نکلے

جو ہوگی صبح تو لوٹیں گے شام سے نکلے

تمام عشق کے ناکام کام سے نکلے

تو مجھ کو چھو کہ تری انگلیاں مہک اٹھیں

یہ میرا جسم بھی فکر دوام سے نکلے

چھپا لیا جو مرا رنگ تم نے آنکھوں میں

کبھی وہ رنگ رخ لالہ فام سے نکلے

خوشی میں ویسے بھی مخصوص کچھ نہیں ہوتا

ملال یہ ہے مرے غم بھی عام سے نکلے

تمہاری ذات سے وابستہ آرزؤں کے

سبھی جلوس بڑی دھوم دھام سے نکلے

گلے میں طوق تو پیروں میں بیڑیاں پہنے

ہم اس گلی سے بڑے اہتمام سے نکلے