jo laDkhaDaen to KHud ko sahaara karte hain

jo laḌkhaḌā.eñ to ḳhud ko sahārā karte haiñ

ham apnī mauj ko apnā kinārā karte haiñ

ḳhudā kā shukr adā karte haiñ har ik lamha

koī bhī vaqt ho hañs kar guzārā karte haiñ

bahut hasīn samajhte haiñ apne-āp ko ham

jab aa.ine meñ ham apnā nazāra karte haiñ

ham apne ghar ko sajāte haiñ āsmāñ kī tarah

isī meñ chāñd isī meñ sitārā karte haiñ

ġhazal ke pīchhe bhaTakte haiñ soī rātoñ meñ

ye hai ḳhasārā to phir ham ḳhasārā karte haiñ

vo jis kā naam hai shohrat kamāl laḌkī hai

ham us ke vāste kyā kyā gavāra karte haiñ

mohabbatoñ kī zabāñ harf se nahīñ bantī

mohabbatoñ meñ diloñ se pukārā karte haiñ

jo laDkhaDaen to KHud ko sahaara karte hain

hum apni mauj ko apna kinara karte hain

KHuda ka shukr ada karte hain har ek lamha

koi bhi waqt ho hans kar guzara karte hain

bahut hasin samajhte hain apne-ap ko hum

jab aaine mein hum apna nazara karte hain

hum apne ghar ko sajate hain aasman ki tarah

isi mein chand isi mein sitara karte hain

ghazal ke pichhe bhaTakte hain soi raaton mein

ye hai KHasara to phir hum KHasara karte hain

wo jis ka nam hai shohrat kamal laDki hai

hum us ke waste kya kya gawara karte hain

mohabbaton ki zaban harf se nahin banti

mohabbaton mein dilon se pukara karte hain