جنون عشق لے آیا ارے ظالم کہاں مجھ کو

جنون عشق لے آیا ارے ظالم کہاں مجھ کو

نظر آتی ہے اپنی زندگی اک داستاں مجھ کو

بلائیں لاکھ صبح و شام کی رعنائیاں مجھ کو

کہا جائے جسے دل اب میسر ہے کہاں مجھ کو

اسے تدبیر سے نسبت اسے تقدیر ہی کہئے

دکھائے زندگی کی ہر روش ناکامیاں مجھ کو

قسم ان بستیوں سے تو کہیں بہتر تھے ویرانے

ملا ہے کچھ نہ کچھ اکثر سکون دل جہاں مجھ کو

عبث بدلے ہوئے موسم کی دل کش چاندنی راتیں

جو بہلائیں نہ تیری یاد کی رنگینیاں مجھ کو

یہ ناکامی کے بعد احساس ناکامی کے ہنگامے

عطا کر دی ہے گویا دولت کون و مکاں مجھ کو

سحرؔ جذبات کا مندر ہے اور حالات کی پوجا

نہ ربط باغباں مجھ کو نہ خبط آشیاں مجھ کو