کر کے منظور فیصلہ دل کا

کر کے منظور فیصلہ دل کا

ہو گیا مجھ کو تجربہ دل کا

کوئی تو پڑھتا میرے چہرے کو

کوئی تو حال پوچھتا دل کا

میں زباں کا خراب ہوں لیکن

لوگ کہنے لگے برا دل کا

آسماں تک دماغ کی ہے اڑان

دل تلک ہی ہے دائرہ دل کا

جانے کیسے بھٹک گئے ہو تم

ویسے سیدھا تھا راستہ دل کا

ہے تباہی میں ہاتھ دونوں کے

ایک تیرا ہے دوسرا دل کا

عشق کا کھیل تیرے بس کا نہیں

تجھ سے ہوگا نہ حق ادا دل کا

آج لگتا ہے چوٹ گہری ہے

آج لگتا ہے دل دکھا دل کا

اتنا سنجیدہ ہو گیا صوفیؔ

پہلے کتنا تھا چلبلا دل کا